Nijoro ara-panjakana ny fikambanana MALAGASY MANORATRA

Ny teny sy ny literatiora Malagasy dia fototra iray lehibe amin’ny kolontsaina sy ny maha-izy antsika. Ho fanohanana sy fampiroboroboana izany dia tafajoro ara-panjakana izao ny Fikambanana MALAgasy MAnoratra (MALAMA-FP), fikambanana iray manandratra ny zavakanto amin’ny alalan’ny asa soratra.

Fiandohana sy fivoarana

Niorina tamin’ny taona 2017, tao amin’ny Kolejy Masindahy Josefa Mahamasina, ity vondrona poetika ity dia nitondra fiovàna sy fivoarana nandritra ny taona maro. Taorian’izany dia niova ho sampana iray tao amin’ny Fikambanana Ankiz’art Anosibe izy ny taona 2019, hatramin’ny taona 2021.

Niforona ho fikambanana mahaleo tena tamin’ny 2022, ka tamin’izany dia nifidy ny birao voalohany i MALAMA-FP. Lany ho Filoha i RAKOTOARIMANANA Sandanomena, izay nitondra ny vina sy tetik’asa vaovao ho amin’ny fivelaran’ny fikambanana. Tamin’io fotoana io ihany koa no niova ny marika famantarana an’i MALAgasy MAnoratra, izay mbola ampiasaina sy manan-kery mandraka ankehitriny.

Tanjona sy vinan’ny fikambanana

Ny tanjona lehibe amin’ity fikambanana ity dia hanandratra hatrany ny teny sy ny literatiora Malagasy, amin’ny alalan’ny:

- Fampiroboroboana ny asa soratra sy ny famoronana

- Fikarakarana hetsika ara-kolontsaina sy fihaonana poetika

- Fampianarana sy fanofanana momba ny literatiora Malagasy

- Fifampizaràna amin’ireo mpanoratra sy mpanakanto samihafa

Ho avy mamirapiratra

Manohy ny lalany amin’ny fanamafisana ny fifandraisana amin’ny mpanoratra, ny tanora mpikaroka, ary ireo tia zavakanto sy teny Malagasy ny MALAMA-FP. Manokatra varavarana ho amin’ny hoavy mamirapiratra ho an’ny literatiora Malagasy izy, manome sehatra ho an’ireo tanora mpanoratra, ary mitondra anjara biriky amin’ny fikajiana ny hasin’ny teny Malagasy.

Ho an’ireo liana amin’ny fikambanana dia afaka manaraka sy manohana hatrany amin’ny sehatra samihafa. Ao anatin’ny fifohazan’ny literatiora Malagasy, ianao koa dia afaka mandray anjara!