Boky: Loharanon'ny fahalalana sy ny kolontsaina

Ao anaty boky no ifonosan’ny fahalalana, ifaharan’ny kolontsaina, ary isintonana aingam-panahy. Isan’ny fototra iorenan’ny fivoaran’ny firenena iray ny fahaiza-mamaky sy manoratra, satria amin’ny alalan’ny boky no ifandimbiasan’ny fahendrena sy ifampitana ny fahalalana amin’ny taranaka mifandimby.

Mahay mamaky boky dia manamafy saina. Ny boky dia fitaratra ahafahana mijery izao tontolo izao amin’ny fomba lalindalina. Manamafy fisainana, mampivelatra toe-tsaina, ary manome fahafahana mamorona sy mieritreritra amin’ny fomba samihafa. Raha mamaky boky ianao, dia tsy hoe mianatra fotsiny, fa manao dia lavitra anaty teny, mamakivaky tontolo hafa, manamafy ny fiainanao amin’ny fahendrena.

Maro ny tombontsoa azo amin’ny famakiana boky

📚 Mampivelatra fahalalana sy fisainana: Manitatra traikefa, mampitombo ny voambolana ary manampy amin’ny fifehezana fiteny.

📚 Manetsika saina sy mamelona fahaizana mamorona: Manampy amin’ny famahana olana sy fananana fomba fijery malalaka amin’ny fiainana.

📚 Mampitohy taranaka sy manandratra kolontsaina: Mampita hafatra sarobidy amin’ny taranaka ho avy, mitahiry tantara sy soatoavina.

📚 Mampisy aingam-panahy: Mamporisika amin’ny fananganana vina sy fanatrarana tanjona.

Ny Fikambanana MALAgasy MAnoratra: Mitondra Fahalalana amin’ny Alalan’ny Boky

Ho fanamafisana ny fitiavan’ny Malagasy mamaky sy manoratra, dia miezaka ny hampiroborobo ny literatiora sy ny famakiana boky ny Fikambanana MALAgasy MAnoratra (MALAMA-FP). Anisan’ny dingana lehibe natao tamin’izany ny famoahana boky izay maneho ny hakanton’ny teny sy ny aingam-panahin’ny mpanoratra, toy ny:

📖 "FO TOA TENY" – Boky amboaran-tononkalo navoakan'ireo sampana telo manerana ny nosy tamin'ny 17 Mey 2023.

📖 "RANO IRAY" – Boky amboaran-tononkalo volaohany navoakan'ny sampana Vakinankaratra tamin'ny .

Manana andraikitra amin’ny fivelaran’ny saina sy ny kolontsaina isika rehetra!

Koa, entano ny tenanao sy ny manodidina anao hamaky boky, fa izany no ahafahantsika mampivelatra ny maha-isika antsika, mitahiry ny kolontsaina, ary mandray anjara amin’ny fandrosoan’ny literatiora Malagasy.