Tsimoka Poezia: Ny fanantenana sy ny ho avy

Toheriko amin'ny heriko rehetra ny fanamaivanana ireo TSIMOKA POEZIA, mipongapongatra etsy sy eroa mamakivaky izao vanim-potoana ankehitrinin'ny Literatiora izao.

Faritako sy sokajiako ho POEZIA MAMAKY TANY no fiantso azy ireny.

Marina fa mety mbola tsy mahatratra ny fenitra takian'ny hatsaran-tarehy maha-Poezia ny Poezia ny ankamaroan'ireo misondrotra sy mihamisandrahaka ankehitriny, nefa tsy azo ihodivirana ihany koa ny mahatafiditra azy ao anatin'ny lasitra fiaingana.

Mitohy amin'ny fandrosoan'ny tantara isika ary mirafitra amin'ny fitohizan'aina fa tsy ho vitsy amin'ireo taranaka any aoriana no hampahatsiaro izay nanadino fa ambioka azo nifantenana voa mankadiry ny soratra teraky ny taona roarivo no mankaty.

Apetrako izao soratra izao ho anareo Poeta Mpamaky tany mba hitohizanareo amin'ny fikatsahana io hatsaran-tarehy miafina io ary fotoana anararaotako ny filazana hoe : ilain'ity Firenena ity ianareo.

Teto aho, eto aho ary tsy ho eto intsony aho indray andro any fa harena lehibe ho an'ny taranaka mifandimby ny fananana Poezia maro azony hifantenana."

Samia mandrosoa hasina daholo, namako!

"HO AN'NY LITERATIORA MALAGASY"

NY IRAKA RAMBOLAMANANA

Antananarivo-2022