TAOMBAOVAO MALAGASY 2024 (MANJAKAMIADANA)

TAOMBAOVAO MALAGASY 2024 (MANJAKAMIADANA), hetsika lehibe nankalazana ny taona vaovao, dia natao tao amin’ny Rovan’i Madagasikara Manjakamiadana, kianja Masoandro ny 10 sy 11 Martsa 2024. Izy ity dia nokarakarain’ny Komity mpikarakara ny Taom-baovao Malagasy, ho fanehoana sy fanamafisana ny soatoavina malagasy amin’izao vanim-potoana manan-danja izao.

Ny 10 Martsa hariva, dia nisy ny afo tsy maty sy ny arendrina, izay singa manamarika ny fahaterahan’ny taona vaovao amin’ny fomba nentim-paharazana.

Ny 11 Martsa tontolo andro kosa dia feno hetsika ara-javakanto samihafa, anisan’izany ny hira, dihy, ary ny tatao na vary amin-dronono tondrahan-tantely, sakafo ara-pomban-drazana fanao amin’ny fankalazana ny taombaovao malagasy.

Nanamarika ity fankalazana ity ihany koa ny fifandimbiasam-pitenenan’ireo mpikarakara sy vahiny manan-kaja, anisan’izany Printsesy RATSIMAMANGA, ny Minisitry ny Serasera sy ny Kolontsaina, Augustin ANDRIAMANANORO, ary ny Filohan’ny Delegasiona Manokan’ny Tanànan’Antananarivo, RAMANAMBITANA Richard.

Nosokafan’ny poeta Fabrizio Rason, mpikambana ao amin’ny Malagasy Manoratra, ity hetsika 10 Martsa ity tamin’ny alalan’ilay tononkalony mitondra ny lohateny hoe "Ny Taom-baovao Malagasy", izay nandravaka sy nanome lanja manokana ny maha-zava-dehibe ny fankalazana.