TAOM-BAOVAO MALAGASY 2024 (Ambohidrabiby)

TAOM-BAOVAO MALAGASY 2024 (AMBOHIDRABIBY) dia hetsika lehibe natao ho fanamarihana ny taombaovao malagasy ka notanterahina tao amin’ny Rovan’Ambohidrabiby ny 11 Martsa 2024. Ity fankalazana ity dia tafiditra ao anatin’ny fandaharam-potoanan’ny Komity mpikarakara ny Taom-baovao Malagasy, izay nanome lanja ny soatoavina sy ny fifampitohy ara-kolontsaina.

Ny 10 Martsa hariva, dia niainga teto Ambohidrabiby ny fandrehetana ny afo tsy maty, alohan’ny hanaparitahana izany manerana an’Antananarivo toa an'i Mahamasina sy Manjakamiadana, mariky ny fifamatorana sy ny firaisankina amin’ity fotoana manan-danja ity.

Ny 11 Martsa maraina, taorian’ny lanonana teny Mahamasina, dia tonga indray teto Ambohidrabiby ireo solontenan’ny Malagasy Manoratra nanohy ny fanandratana ny teny sy ny zavakanto. Notononina tamin-kalalahana sy fahatsapana lalina teto amin’ity toerana manan-tantara ity ilay tononkalon’i Fabrizio Rason, mitondra ny lohateny hoe "Ny Taombaovao Malagasy".

Tao anatin’ny lanonana dia nisy ihany koa ny nofon-kena mitam-pihavanana, nentina nanamafisana ny fihavanana sy firaisankina maha-Malagasy, izay manamarika ny hasin’ity taom-baovao ity ho an’ny firenena.