
Anaran'ny hetsika :
SORATRA MITENY
Sokajy :
Antsa tononkalo
Mpikarakara:
MALAgasy MAnoratra sampana Vakinankaratra
Daty:
2 Desambra 2023
Toerana:
Tranoben'ny serasera sy ny kolontsaina Akon'Ankaratra Antsirabe
SORATRA MITENY
SORATRA MITENY, hetsika voalohany nokarakarain’ny Malagasy Manoratra sampana Vakinankaratra, dia natao ny 2 Desambra 2023 tao amin’ny Tranoben’ny Serasera sy ny Kolontsaina Akon’Ankaratra Antsirabe. Tanjona tamin’ity fihaonana ity ny hampahafantatra amin’ny fomba ofisialy ny fisian’ny sampana Vakinankaratra sy hampiroboroboana ny tontolon’ny haisoratra amin’ny alalan’ny antson-tononkalo.
Ho mariky ny firaisankina sy ny fiaraha-mientana, dia tonga nanotrona ny hetsika ny solontena avy amin’ny Malagasy Manoratra sampana hafa. Teo ny sampana Analamanga, notarihin’ny Sekretera Nasionaly, Nah Haja, sy ny sampana Itasy, nahitana an’i David Albin, filoha lefitry ny sampana. Tsy latsa-danja koa ireo fikambanana namana izay tonga nanohana sy nandray anjara tamin’ny fiantseharana. Anisan’izany ny Faribolana Sandratra, Havatsa UPEM, Bira Iray Lenta, Mian’Art Association, ...
Nisongadina tamin’ny hetsika ny fiombonan’ny poeta avy amin’ny lafivalon’ny Nosy, nanasongadina fa mitoetra ho hery manosika ny fiaraha-monina hatrany ny teny sy ny soratra. Ny fahatongavan’ny solontenan’ny fikambanana maro dia nanome lanja manokana ny hetsika ary nampisy fifankafantarana bebe kokoa teo amin’ny mpanoratra samihafa.
Nitondra hafanana sy aingam-panahy ho an’ny rehetra ny fanatanterahana ny SORATRA MITENY, izay manamarika dingana lehibe amin’ny fampivoarana ny haisoratra sy ny fiaraha-mientan’ny poeta malagasy.
























