MIANTSA KANTO

Tamin’ny 15 Aprily 2023, dia tontosa tao amin’ny Centre KETSA Vontovorona ny hetsika "MIANTSA KANTO", nokarakarain’ny ONG Ketsa. Fihaonana miavaka sy feno hafanana ity fotoana ity, satria ankoatra ny antsa tononkalo dia natao sehatra ho an’ny ankizy ihany koa mba hanehoany ny talentany sy hizarany amin’ny rehetra ny fahaizany. Nanasana fikambanana maro malaza amin’ny sehatry ny literatiora sy zavakanto ny ONG Ketsa, ka isan’izany ny MADAGASLAM, FARIBOLANA SANDRATRA, ary MALAGASY MANORATRA, izay samy nandray anjara mavitrika tamin’ny fanandratana ny soratra sy ny fiteny malagasy.

Nisongadina tamin’ity hetsika ity ny fanotronan’ny Ray aman-drenin’ny ankizy, ireo mpanabe, ny tanora namana, ary ireo zoky sy kilonga rehetra izay miara-mitombo ara-kolotsaina ao amin’ny Centre Ketsa. Nanamarika ity fihaonana ity ihany koa ny fifampizarana sy fifampikasohana teo amin’ny taranaka samihafa, ka nahafahan’ny ankizy mahazo ainga vaovao sy fanentanana avy amin’ireo zoky efa mandalina lalindalina kokoa amin’ny sehatry ny literatiora sy zavakanto.

Nanamafy ny fifandraisana misy eo amin’ny MALAGASY MANORATRA sy ny ONG Ketsa koa ny fisian’ireo ankizy mpikambana ao amin’ny fikambanana literera, izay nanome lanja manokana an’ity hetsika ity. Nofaranana tamin’ny fiaraha-misakafo sy fiarahabana niaraka tamin’ireo ankizy, ray aman-dreny ary ireo mpikarakara rehetra ny fotoana, ka namela fahatsiarovana tsy hay hadinoina sy nanamafy ny faniriana hitohy hatrany ny fampiroboroboana ny kanto sy ny teny malagasy.