IRIE FESTIVAL 2ème Edition

Ity andiany faharoa amin’ny IRIE FESTIVAL dia nanaporofo indray fa misokatra amin’ny zavakanto amin’ny endriny maro i Madagasikara. Natao tamin’ny 13 sy 14 Mey 2023 tao amin’ny Sapitô Metisy an-Kantsa Ambohitrombihavana Ambohimangakely, dia hetsika iray niompana tamin’ny fiarovana ny tontolo iainana sady nampivondrona artista maro. Ny tanjona dia ny hanamafisana ilay vina "Madagascar Green Island", izay maneho faniriana hamelona indray an’i Madagasikara ho nosy maitso sy hiaro ny tontolo iainana amin’ny alalan’ny zavakanto sy fihetsika ara-tontolo iainana.

Araka ny nanamarihana ny andiany voalohany, dia mbola nandray anjara tamin’ity andiany faharoa ity ny Malagasy Manoratra, izay nisolo tena ny zavakanto am-bava tamin’ny alalan’ny haisoratra sy ny kabary poetika. Niavaka ny fifampizarana teo amin’ireo mpanakanto isan-tsokajiny, izay nahitana an’ireo mpiangaly mozika toa an’i Abdozy, Kyàlaà, Scaertel Rakoto, Gesta po Zanzibar, Akat, Ny Jinja, Imahavelo, sy ny maro hafa. Tsikaritra fa maro amin’izy ireo no mitondra hafatra amin’ny alalan’ny feo sy gadona, mampitambatra ny kolontsaina sy ny fiarovana ny tontolo iainana amin’ny endrika mozika.

Tsy latsa-danja amin’izany koa ireo mpanakanto amin’ny sehatra hafa toy ny haiteny am-bava, izay ahitana an’i Imerina Merina, Voary Kanton’Ambohitsaina, Andrianavalona, Malagasy Manoratra, Roy Slam, Stand Up, Rindra Faniry, izay nandray anjara tamin’ny alalan’ny tononkalo, slam, ary fanehoana tantara an-tsehatra. Nitondra fiainana tao amin’ny festival ihany koa ny sehatry ny dihy, ka teo no nanehoan’ny Compagnie MBAKS, El Kimmy, Fito by Ophelie.R, Parkouro ny talentany tamin’ny fihetsika mirindra sy mirakitra hafatra lalina.

Ankoatra izay dia nisongadina ihany koa ireo mpanao zavakanto amin’ny sary sy hosodoko, toy ny Maherisoa Rakotomalala, Finengo Mahasaky, Zongo Bilaky, Mad'arbre - Mad Hazo Camping, izay nampiseho ny zava-kanto amin’ny endrika hita maso. Nahatonga hafatra mivantana ho an’ny rehetra ny sangan’asany, indrindra amin’ny lafiny natiora sy tontolo iainana.

Nanjary fotoana iray namelombelona ny fiarahamonin’ny artista ity IRIE FESTIVAL 2ème Edition ity, satria nahafahan’izy ireo nifandray, nifampizara traikefa, ary nanamafy ilay firaisankina ho amin’ny fikajiana an’i Madagasikara ho nosy maitso. Tsy vitan’ny nahafinaritra sy namelombelona ara-tsaina sy ara-kolotsaina fotsiny ilay hetsika, fa niteraka fifanakalozana sy fanentanana lehibe ho amin’ny fiarovana ny tontolo iainana amin’ny alalan’ny zavakanto.