HIVENTY TENIN-DRENY

Ny 23 Jona 2024, dia tontosa soa aman-tsara tao amin’ny Ivontoerana Fifampizarana Art Kolotsaina Ambany Tanàna Ankiz'Art Anosibe ny hetsika HIVENTY TENIN-DRENY, izay natokana hanamarihana ny iray volan’ny teny malagasy. Ity no hetsika voalohany notanterahin’ny Malagasy Manoratra sampana Analamanga teo ambany fitarihan’ny filoha nasionaly vaovao, Njarasoa RA, izay nametraka fanavaozana amin’ny fomba fampisehoana sy fikarakarana antsa tononkalo.

Tsy toy ny mahazatra, fa nisy fanovana sy fanatsarana natao tamin’ity andiany ity. Raha nampiavaka ny antsa tononkalo hatramin’izay ny fahalalahan’ny fandraisana anjara, dia nanomboka teto dia voafetra ny isan’ny mpandray anjara ary nisy fifantenana manokana natao. Ny endrika vaovao nampiharina dia fiomanana amin’ny alalan’ny famerenana mialoha, izay nahatonga ny sehatra ho voalamina tsara, ka nanome fahafaham-po bebe kokoa ho an’ny mpijery.

Ireo namelona ny sehatra tamin’ity andiany manokana ity dia valo mianadahy, nahitana an’i Ny Aina Gaë, Aina Lalatiana, Njarasoa RA, Fabrizzio Rason, Antoine Tahiana, Nah Haja, Germi Haravia, sy Njerarica. Izy ireo no nitambatra ka niaraka niventy ny tenin-dreny.

Nanome lanja manokana ny teny malagasy sy ny fitiavan-tanindrazana ny hetsika. Ny tononkalo nantsaina dia nofidina tamin’ny fomba hentitra mba hanamafisana ny fahatsapan’ny tsirairay amin’ny hasin’ny tenin-dreny sy hanentanana amin’ny fampiroboroboana azy amin’ny sehatra samihafa. Hita tamin’ny zava-niseho fa tsy sehatra fanehoana tononkalo tsotra fotsiny intsony ny hetsika ataon’ny Malagasy Manoratra, fa efa lasa sehatra matihanina, izay mitaky fiomanana tsara sy fahatsiarovan-tena amin’ny lanjan’ny hafatra ampitaina amin’ny fiarahamonina.

Amin’ity fanatsarana natao ity, dia manamafy ny tanjony ny Malagasy Manoratra, dia ny hanandratra hatrany ny teny malagasy amin’ny alalan’ny zavakanto sy ny soratra. Io fanovana io dia mariky ny fiomanana amin’ny fanandratana ny antsa tononkalo ho amin’ny ambaratonga matihanina kokoa, ka hahatonga azy ho sehatra milamina sy voarindra.

Amin’ny ankapobeny, dia azo lazaina fa nahitam-bokatra tsara ny HIVENTY TENIN-DRENY. Naneho firaisankina sy fahavononana amin’ny fampiroboroboana ny teny malagasy ny rehetra tonga nanatrika, ary nampahatsiahy ny maha-zava-dehibe ny fifehezana sy fitiavana ny tenin-drazantsika. Ity hetsika ity dia nametraka fanehoana mazava fa mitodika amin’ny ho avy amin’ny fomba matotra sy voaomana tsara ny Malagasy Manoratra, ka hanohy hampivoatra hatrany ny seho ataony amin’ny dingana manaraka.