
Anaran'ny hetsika :
HIAKAN'NY NATIORA
Sokajy :
Hetsika fiarovana ny tontolo iainana
Mpikarakara:
MALAgasy MAnoratra
Daty:
30 Oktobra 2022
Toerana:
Valan-javaboary Tsimbazaza
HIAKAN'NY NATIORA
Ny HIAKAN’NY NATIORA, natao ny 30 Oktobra 2022 tao amin’ny Valan-javaboary Tsimbazaza, dia hetsika nokarakarain’ny Fikambanana MALAGASY MANORATRA ho fampahatsiahivana sy fanentanana amin’ny fiarovana ny tontolo iainana.
Nisesy loatra ny fahamaizana tamin’io volana io: hain-trano nisesisesy teto Antananarivo, doro tanety mahatsiravina kosa tany amin’ny faritra maro. Manana andraikitra noho izany ny mpanakanto hanaitra sy hampita hafatra amin’ny fiarahamonina, hamporisika ny tsirairay hitandrina amin’ny afo, ary hanentana amin’ny fanajàna ny tontolo iainana.
Noho izany, dia nosafidiana manokana ny Valan-javaboary Tsimbazaza ho toerana nanatanterahana ny hetsika. Nisy fanentanana natao tamin’ireo mpitsidika, antsa tononkalo, ary fizarana taratasy fanabeazana (flyers) ho fampahafantarana bebe kokoa ny olana ateraky ny fandoroana tanety sy ny fahasimban'ny tontolo iainana.
Niara-nanohana sy nampita ity hetsika ity ny Gazety Taratra sy ny ICM Radio, izay nandray anjara tamin’ny fanaparitahana ny hafatra amin’ny besinimaro.
























