FO TOA TENY II

Ny hetsika FO TOA TENY andiany faharoa, izay natao tamin’ny 13 Mey 2023 tao amin’ny efitrano Dox, Tranombokim-pirenena Anosy, dia nanamarika dingana lehibe ho an’ny fikambanana MALAGASY MANORATRA. Ity no fotoana nisokafan’ny pejy vaovao tamin’ny famoahana ny boky voalohany navoakan’ny fikambanana, mirakitra asasoratra avy amin’ny mpanoratra 20 mianadahy avy amin’ny sampana telo: Toamasina, Itasy ary Analamanga. Asa soratra misongadina sy maneho ny fitiavan-tanindrazana, fitiavana, ary fiainam-piarahamonina no hita ao amin’ity boky FO TOA TENY ity, maneho ny fahatsapan’ny mpanoratra sy ny fanehoan-keviny amin’ny alalan’ny teny.

Nisongadina tamin’ity hetsika ity ny fanohanana sy ny firaisankinan’ny mpanoratra, satria ezaka niarahana tamin’ny rehetra no nahatongavana amin’ny fahatontosan’ity boky ity. Raha tsiahivina, efa tamin’ny fitantanan’i Fidy Art Niaina no nanombohana ny fanomanana ny boky, ary nitohy tamin’ny ezaka nataon’ny filoha nasionaly Rakotoarimanana Sandanomena sy ny mpikambana rehetra manerana an’i Madagasikara. Tsy natao ho an’ny fikambanana irery ihany anefa ity boky ity fa misokatra ho an’ny mpamaky sy mpankafy literatiora rehetra, ho fanandratana ny literatiora malagasy sy ho fanehoana ny herin’ny teny amin’ny fanabeazana sy fanentanana ny saina.

Ireto avy ireo mpanoratra 20 mianadahy tafiditra ao amin'ny boky FO TOA TENY, izay avy amin’ny sampana telo nisy tamin’izany fotoana:

• Malagasy Manoratra Sampana Toamasina:

  1. Ilo Nanahary

  
  

• Malagasy Manoratra Sampana Itasy:

  2. Malala

  3. Diary Rakotoson

  4. Niaina Mikalo Fitia

  5. Hery Ny Fitia

  
  

• Malagasy Manoratra Sampana Analamanga:

  6. Mikalo Lvs

  7. I-Nesy

  8. Vetson'ny Fy-Arovana

  9. Hanitra Randria

  10. Niah Harilala

  11. Sariaka Valea

  12. Joharim-panahy

  13. Ariela Fanoitra

  14. Naj Haja

  15. Njarasoa RA

  16. Bary Aingo

  17. Fidy Art Niaina

  18. Sanda Nomena

  19. Kintan'ny Natiora

  20. Ny Erana

  
  

Ireo rehetra ireo dia nandray anjara tamin’ny famoronana sy fanangonana asa soratra ho ao anatin’ity boky ity, izay maneho ny fahasamihafan’ny feo sy ny fomba fisainana eo amin’ny sehatry ny literatiora malagasy.

Nanome hasina ity tsangambato volaohany ity ny fandraisan’anjaran’ny akademisianina Rabe Jiber, izay nanao ny teny fanolorana. Nandravaka ny sehatra tamin'ny talentany ihany koa i Fara Gloum, nitendry sy nikalo ireo hira namantarana azy. Tao anatin’ny tontolo feno fihetseham-po sy fankasitrahana no nanatontosana ity hetsika ity, ary niaina anaty hira sy tononkalo ny rehetra, maneho fa ny teny sy ny zavakanto dia mbola mijanona ho herin’ny fiarahamonina malagasy.

Ny famoahana ity boky ity dia tsy ho vita raha tsy nisy ny fanohanana avy amin’ny Malama Edisiona sy ny Ivotoerana Ankiz’Art, izay nandray anjara lehibe tamin’ny fanatontosana azy. Toy izany koa, ny fampahafantarana azy dia natao tamin’ny alalan’ny Radio Plus, Iarivo Radio, ary Radio Vakiniadiana, izay nampiely ny vaovao mba hahafahan’ny maro mahalala sy mankafy ity asa soratra manan-danja ity. Mahavelombolo ny mahita fa misandratra hatrany ny literatiora malagasy, ary amin’ny alalan’ny hetsika tahaka izao dia mitombo sy miroborobo ny fitiavan-tsoratra eto Madagasikara.