FO TOA TENY

Ny "FO TOA TENY", hetsika iray nokarakarain’ny Ministeran'ny Serasera sy ny Kolotsaina, Tranombokim-pirenena eto Madagasikara, ary ny Fikambanana MALAGASY MANORATRA, dia notanterahina tao amin’ny Tranombokim-pirenena Anosy ny Zoma 26 Novambra 2021. Nifantoka tamin’ny antsa tononkalo, antsa soratra fohy, ary ny slam ity fihaonana ara-kolontsaina ity, ka niavaka tamin’ny fanatrehany ireo mpanakanto sy poeta manana ny maha-izy azy. Nampiavaka ny lanonana ny fanatrehan’ny ekipan’ny "Trandraka Talenta", izay notarihin’i Vetson’ny Fanahy, nanome aina sy loko manokana tamin’ny sehatra.

Ity no hetsika voalohany nataon’ny Fikambanana Poeta sy Mpanoratra MALAGASY MANORATRA taorian’ny nitokanany ho fikambanana mahaleo tena. Na dia nanana ny fahaleovantenany aza, dia mbola nanohy fiaraha-miasa sy nifandray akaiky tamin’ny Fikambanana ANKIZ’ART hatrany, manohy hatrany ny tanjona dia ny fampiroboroboana sy fanomezana sehatra ireo mpanakanto eny ambany tanàna.

Sivy mianadahy ireo nitarika sy nikarakara ity hetsika ity, ka anisan’izany i Stephan H.R, I-Ness, Valérie RKT, Theo Fandrotrarana, Vetson’ny Fy-Arovana, Fidy Art Niaina, Tsinjonarivo, Fenosoa Toavina, ary Lisy Kely. Tonga nanome voninahitra izany koa ny Filoha Mpanorina ny Ankiz’Art, RANDRIAMIRIJASON Tolojanahary J.S, manamarika fa mbola miray fo amin’ny fiainan’ny zavakanto ilay fikambanana nipoiran’izy ireo.

Nanjary hery lehibe ho an’ny fikambanana ity fiseharana voalohany ity, satria na dia andro fiasana sy fianarana aza ny Zoma 26 Novambra, dia feno hipoka ny Efitrano DOX. Maneho izany fa mihamivelatra sy misandratra hatrany ny sehatry ny tononkalo sy ny literatiora amin’ny endriny rehetra eto Madagasikara.

Isaorana hatrany koa ny Gazety Taratra noho ny fanohanany hatrany ny hetsika karakarain'ny MALAGASY MANORATRA