FETIN'NY MOZIKA

Ny 18 Jona 2022 no nanatanterahana ny Fetin'ny Mozika, hetsika nokarakarain’ny Compagnie MBAKS tao amin’ny Sapitô Metisy An-Kantsa Ambohitrombihavana Ambohimangakely. Tsy vitan’ny nankalaza ny mozika fotsiny ity hetsika ity, fa lasa sehatra iray lehibe nanamafy sy nampivelatra hatrany ny fisian’ny fikambanana MALAGASY MANORATRA, izay teo ambany fitantanan’ny Filoha Nasionaly RAKOTOARIMANANA Sandanomena Aymar tamin’izany fotoana.

Iray amin’ny fiaraha-miasa lehibe nahafahan’ny fikambanana nisehatra tamin’ity hetsika ity ny fifandraisana efa niorina tamin’ny ANKIZ'ART, izay namolavola lalana ho amin’ny sehatra lehibe kokoa. Tao anatin’ity lanonana ity, dia nisokatra bebe kokoa ho amin’ny tontolon’ny zavakanto ny MALAGASY MANORATRA, satria ireo mpanakanto efa nisehatra ivelan’i Madagasikara no nanokatra varavarana sy nanome sehatra ho an’ireo poeta sy mpanoratra mandrafitra ny fikambanana.

Naseho tamin’ny endrika samihafa ny zavakanto, ka ankoatra ny mozika dia nisy ihany koa ny dihy, tononkalo, hosodoko, hatsikana, ary famoronana zavamaneno. Nanome lanja ny fifampizarana traikefa teo amin’ny samy mpanakanto ny hetsika, ka maro ireo fiaraha-miasa vaovao no teraka vokatr’izany. Lasa sehatra iray nanehoana ny fahamatoran’ny fikambanana eo amin’ny tontolon’ny literatiora sy zavakanto ny Fetin'ny Mozika 2022, manamafy fa mitohy hatrany ny dian’ny MALAGASY MANORATRA amin’ny fanandratana sy fampivelarana ny soratra sy kanto malagasy.