AFOM-PITIAVANA

AFOM-PITIAVANA, hetsika natao ny 9 Desambra 2023 tao amin’ny EPP Todivelo Raphael Ankirihiry, dia nanamarihana ny fanambarana ofisialy ny fisian’ny Malagasy Manoratra sampana Toamasina. Io dia dingana iray lehibe amin’ny fivelaran’ny fikambanana manerana an’i Madagasikara, izay tarihin’ny filoha Ilo Nanahary any amin’ity sampana ity.

Nanome voninahitra ny hetsika ny Filoha Mpanorina Nasionaly, Fidy Art Niaina, sy ny Filoha Lefitry ny Malagasy Manoratra sampana Itasy, David Albin. Fanehoana firaisankina sy fanohanana izao fahaterahan’ny sampana vaovao izao.

Nampiaina sy nandravaka ny lanonana ny fiantsana tononkalo nataon’ireo mpikambana ao an-toerana, ary nisongadina koa ny tononkalo sy ny tantara nolalaovin’ny Tanora Mahay Raha (TAMARA), fikambanana tarihin’ny filohany, Dova Namanao, izay Filoha Lefitry ny Malagasy Manoratra sampana Toamasina ihany koa.

Na dia nangaina aza ny andro, dia feno olona ny toerana tao amin’ny EPP Todivelo Raphael Ankirihiry, porofon’ny fitiavana ny haisoratra sy ny zavakanto. Nifampizara traikefa sy fiainana ireo mpandray anjara, ary nisaraka tamin’ny fo faly sy fahatsiarovana mamy ny rehetra.

Ny alin'io fotoana io moa dia mbola nisy ny Donak'afom-pitiavana izay niafampizarana sy niantsana tononkalo mandramaraina.

Ny Malagasy Manoratra dia manana tanjona lehibe amin’ny fametrahana sampana manerana ny faritra 23 eto Madagasikara. Raha jerena ny fivoarany dia faritra dimy no efa ahitana ny fikambanana amin’izao fotoana izao ireo sampana efatra: Analamanga, Itasy, Vakinankaratra, Antsinanana, ary Analanjirofo. Mijanona ho tanjona mazava ny fanitarana izany mba hampiroboroboana hatrany ny haisoratra sy ny zavakanto malagasy amin’ny faritra rehetra.