ADILAHY POETIKA

ADILAHY POETIKA, hetsika goavana nenti-nanainga ny fiaraha-monina amin’ny alalan’ny tononkalo, dia notontosaina ny 12 Novambra 2023 tao amin’ny Ivontoerana Fifampizarana Art Kolotsaina Ambany Tanàna Ankiz’Art Anosibe. Fikambanana telo lehibe no niara-nikarakara azy: Ankiz’Art, Malagasy Manoratra, ary Mian’Art Association. Hetsika nialoha lalana ny fifidianana filoham-pirenena natao ny 16 Novambra 2023, niompana tamin’ny fiainam-pirenena, ka nampita hafatra momba ny fihavanana, firaisankina ary fifankatiavana.

Tsy vitan’ny fanehoana kanto fotsiny ity fihaonana ity fa fihaonan’ny tononkalo sy ny adihevitra ara-tsaina, naranty tamin’ny alalan’ny soratra sy feo. Nitondra ny talentany ireo mpanoratra sy mpikanto 13 mianadahy, izay nampifandraisina tamin’ny isan’ny kandida filoham-pirenena tamin’izany fotoana izany. Nahitana an’i Fidy Art Niaina (Ankiz’Art), RABE Jiber (Havatsa-UPEM), Mino Ramahefa, Haintso (Mian’Art Association), Hery Ny Fitia (MALAMA-FP Itasy), Mikalo, Nah Haja (MALAMA-FP Analamanga), Hiaka, Stéphan RAZ, Ny Andry (MALAMA-FP Analamanga), Tsiolaka (MALAMA-FP Itasy), Araka (MALAMA-FP Analamanga), ary Vetson’ny Hina (Mian’Art Association). Nanokatra izany tamin'ny fomba ofisialy moa ny tompon'andrikitry ny Ivontoerana, RANDRIAMIRIJASON Tolojanahary J.S. Nandravaka tamin'ny hira kosa i Julie Care sy Mino Ramahefa.

Ny fandraisana anjaran’ireo mpanentana Mamy Nantenaina sy Miah Rabeson, izay tompon’andraikitry ny fandaharana Bitsiky ny Soratra ao amin’ny Iarivo Radio, dia nanome lanja sy hafanana manokana tamin’ny hetsika. Tsy latsa-danja koa ny fandraisana andraikitry ny haino vaky jery toa ny Radio Bon Bosco, Iarivo Radio, Free FM, Gazety Taratra, ary Gazety La Vérité, izay nampahafantatra bebe kokoa ity fihetsiketsehana ara-kolontsaina ity ho an’ny besinimaro.

Anisan'ny fanaon'ny Malagasy Manoratra moa dia omena anjara fitenenana hatrany ny zoky Ny Iraka RAMBOLAMANANA (Faribolana Sandratra) eny ampiafaran'ny hetsika ho fanomezam-boninahitra azy izay angady nananana sy vy nahitana, niandohan'ny fikambanana MALAGASY MANORATRA.

Ankoatra izany, nanamarika ny hetsika ihany koa ny fifandraisan’ny fikambanana telo nanatanteraka azy. Raha tsiahivina, ny Malagasy Manoratra dia sampana iray tao amin’ny Fikambanana Ankiz’Art talohan’ny nampaleo tena azy, ary ny Mian’Art Association kosa dia fikambanana misehatra amin’ny teatra, izay niainga avy amin’ny Malagasy Manoratra. Ity fiarahana namelona an’i ADILAHY POETIKA ity àry dia porofo fa mbola velona sy mamiratra hatrany ny firaisankinan’ny mpanakanto amin’ny fanehoana ny heviny sy amin’ny fanentanana ny vahoaka amin’ny alalan’ny zavakanto.