Boky nivoaka ofisialy teo anivon'ny Ministeran'ny Serasera sy ny Kolontsaina ny 17 Mey 2023, mari-pamantarana lehibe ho an'ny Fikambanan'ny Poeta sy Mpanoratra MALAGASY MANORATRA (MALAMA-FP). Tontosa tamim-pomba manetriketrika tao amin'ny Tranombokim-pirenena Anosy ny antsa famoahana azy, hetsika nanangona ireo poeta, mpanoratra, sy mpankafy literatiora izay tonga nanome voninahitra ity dingana vaovao ity.
Ity boky ity dia no tsangam-bato voalohany niarahana tamin'ny Filoha Nasionaly RAKOTOARIMANANA Sandanomena Aymar (filoha 2022 - 2024) , tsy vitan’ny hoe famoahana voalohany nataon’ny fikambanana, fa porofo mivaingana ihany koa amin’ny firoboroboan’ny literatiora malagasy sy ny fandraisana anjaran’ireo mpanoratra amin’ny fanamafisana izany. Ahitana asa soratra avy amin’ny mpikambana miisa 20 ity boky ity, samy mitondra ny fomba fijeriny sy ny fanehoany manokana ny tontolo iainana, ny fiainam-piarahamonina ary ny aingam-panahy poetika.
Manamarika tantara amin’ny sehatry ny asa soratra malagasy ity famoahana ity, satria tsy vitan’ny hoe sehatra ho an’ny mpanoratra namolavola ny fahaizany sy nampita ny hafany amin’ny alalan’ny soratra, fa manaporofo ihany koa fa mitohy velona sy misandrahaka hatrany ny kolontsaina ara-tsoratra eto Madagasikara. Tsy mijanona hatreo anefa ny ezaka, fa mitohy ny fandraisana andraikitra amin’ny fampiroboroboana sy fampahafantarana bebe kokoa ny literatiora malagasy amin’ny sehatra maro samihafa.
Ireto avy ary izy 20 mianadahy nandrafitra ity boky FO TOA TENY ITY:
Diary RAKOTOSON, I-ness Nia'h Harilala Ny Malala Niaina Mikalo Fitia Mikalo LVS Vetson'ny Fy-Arovana Ariela Fanoitra Joharim-panahy Hanitra Randria | Sariaka Valea Ilo Nanahary Kintan'ny Natiora Njarasoa RA Fidy Art Niaina Hery Ny Fitia Sanda Nomena Bary'Aingo Ny Erana Nah Haja |